ਕੇਂਦਰ ਸਰਕਾਰ ਨੇ ਕਿਹਾ ਪਹਿਲਾਂ ਹੋਵੇਗਾ ਅਧਿਐਨ, ਫ਼ਿਰ ਮਨਜ਼ੂਰੀ
ਨਵੀਂ ਦਿੱਲੀ:- ਅਧੂਰੇ ਰੂਪ 'ਚ ਉਨਤ 'ਬੀ.ਟੀ. ਬੈਂਗਣ' ਦੀ ਕਾਸ਼ਤ ਨੂੰ ਭਾਰਤ 'ਚ ਫ਼ਿਲਹਾਲ ਇਜਾਜ਼ਤ ਨਹੀਂ ਮਿਲੇਗੀ। ਵਾਤਾਵਰਣ ਪ੍ਰੇਮੀ, ਖੇਤੀ ਮਾਹਰਾਂ ਤੇ ਮਾਨਵ ਵਿਗਿਆਨੀਆਂ ਦੇ ਤਿੱਖੇ ਵਿਰੋਧ ਦਾ ਸਾਹਮਣਾ ਕਰਨ ਵਾਲੇ 'ਬੀ.ਟੀ. ਬੈਂਗਣ' ਦੀ ਕਾਸ਼ਤ ਲਈ ਕੇਂਦਰ ਸਰਕਾਰ ਨੇ ਇਜਾਜ਼ਤ ਦੇਣ ਤੋਂ ਅੱਜ ਸਾਫ਼ ਨਾਂਹ ਕਰ ਦਿੱਤੀ। ਸਰਕਾਰ ਨੇ ਕਿਹਾ ਹੈ ਕਿ ਪਹਿਲਾਂ ਬੀ.ਟੀ. ਬੈਂਗਣ ਦਾ ਪੂਰਾ ਅਧਿਐਨ ਕੀਤਾ ਜਾਵੇਗਾ, ਜਿਸ ਤੋਂ ਬਾਅਦ ਹੀ ਭਾਰਤ 'ਚ ਇਸ ਦੀ ਰਸਮੀ ਕਾਸ਼ਤ ਸਬੰਧੀ ਫ਼ੈਸਲਾ ਹੋਵੇਗਾ। ਸਰਕਾਰ ਨੇ ਕਿਹਾ ਹੈ ਕਿ ਮਨੁੱਖੀ ਸਿਹਤ 'ਤੇ ਮਾੜੇ ਪ੍ਰਭਾਵ ਪੈਣ ਦੀ ਸੂਰਤ ਵਿਚ ਬੀ.ਟੀ. ਬੈਂਗਣ ਨੂੰ ਕਿਸੇ ਵੀ ਹਾਲਤ 'ਚ ਮਨਜ਼ੂਰੀ ਨਹੀਂ ਮਿਲ ਸਕੇਗੀ।
ਇਸ ਤੋਂ ਪਹਿਲਾਂ ਵਾਤਾਵਰਣ ਮੰਤਰੀ ਜੈ ਰਾਮ ਰਮੇਸ਼ ਨੇ ਸੰਕੇਤ ਦਿੱਤਾ ਸੀ ਕਿ ਉਹ ਇਸ ਸਬੰਧੀ ਕੀਤੇ ਜਾਣ ਵਾਲੇ ਫ਼ੈਸਲੇ 'ਚ ਆਮ ਆਦਮੀ ਦੀਆਂ ਭਾਵਨਾਵਾਂ ਦਾ ਖਿਆਲ ਰੱਖਣਗੇ। ਵਾਤਾਵਰਣ ਵਿਭਾਗ ਬੀ.ਟੀ. ਬੈਂਗਣ ਬਾਰੇ ਫ਼ੈਸਲਾ ਕਰਨ ਦੀ ਆਪਣੀ ਪ੍ਰਕਿਰਿਆ ਨੂੰ ਗੁਪਤ ਰੱਖਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਦੱਸਿਆ ਜਾਂਦਾ ਹੈ ਕਿ ਇਸ ਲਈ ਮਾਹਰਾਂ ਦੀ ਇਕ ਟੀਮ ਕਰ ਰਹੀ ਸੀ, ਜੋ ਵੱਖ-ਵੱਖ ਸ਼ਹਿਰਾਂ ਤੋਂ ਮਿਲੀਆਂ ਸਲਾਹਾਂ ਅਤੇ ਸੂਬਿਆਂ ਦੀਆਂ ਦਲੀਲਾਂ ਦੇ ਆਧਾਰ 'ਤੇ ਰਿਪੋਰਟ ਤਿਆਰ ਕਰ ਰਿਹਾ ਸੀ।